一代巨星陳百強於80年代紅極一時，可惜嘅係，佢响1992年5月因為用酒送安眠藥，昏迷送院，一年幾之後，喺1993年10月25號逝世，至今已25年。

陳百強細細個已經被譽為神童，佢雖然無正式跟過老師學電子琴，連琴譜都唔識睇，但啲旋律一聽，就實記得。1983年紅磡體育館揭幕，當年25歲嘅陳百強成為响嗰度開騷嘅最年輕歌手。佢唱過唔少好歌，就好似《幾分鐘的約會》、《漣漪》、《一生何求》等等，喺《春嬌救志明》入面，就用過陳百強首《當我想起你》作為電影插曲，勾起唔少歌迷嘅回憶。

除此之外陳百強都拍過唔少戲，就好似1987年上映嘅《秋天的童話》，呢套戲被喻為港產片史上最成功嘅愛情片之一，戲入面陳百強飾演一個喺外國留學嘅有錢仔Vincent，背叛咗戲入面嘅女友、由鍾楚紅飾演嘅十三妹，而十三妹之後就同咗周潤發飾演嘅船頭尺一齊。《秋天的童話》編劇羅啟銳曾經話過，當時佢撰寫劇本嘅時候，一早已經諗好呢個角色要由陳百強飾演，佢仲話香港無幾多個藝人具備呢種氣質。

陳百強喺35歲嘅時候就離開咗大家，歌迷只能從歌聲仲追憶依位樂壇紅星。

圖片嚟自網絡。